Tʋ "bo 'a baewlu‑
72
Salomɔ ɔɔ' wlu.
'Oo Kea, ‑ɩn nʋɛ ka ‑ma ‑jea 'pee ɛ,
Tʋ "bo 'e 'peeje kan', ka ‑ɩn ‑srɛai" ɛ,
'blʋajei 'a "ju 'je "i 'srɛ kan'.
2 Ɔ 'je ‑ma 'cɛ 'ɛ 'pee 'je 'de "isrɛa' 'ʋn
‑wɛe ɔ 'je ‑ma wɛenyʋ 'a 'pee 'je 'de "i 'srɛa 'ʋn ‑ke.
3 Pɛe 'a blua' 'wlʋ 'e crʋ "kpei ɛ 'je i "si,
‑wɛe "isrɛa' 'wlʋ crʋ "kpo "kpei 'de nyiiɔɔ' ‑tɩ' 'ʋn.
4 Ɔ 'tmʋ nyʋ ʋʋa ‑tua" 'kle 'a "kpei ‑tɩ,
ɛ ke wɛenyʋ ke‑, ɔ 'je nɩa" jeʋn 'a "nynuu 'pʋʋ‑,
nyʋ ‑ʋʋa ‑tua" nyʋ 'kle ɔ 'je ‑mʋ ‑wi" i waa.
5 ‑Bo 'cʋ ke 'jrʋ a sea fan,
nyiɔɔ muɛ ‑ʋn ‑pleea' 'de nɔ" 'oo nɔ" ‑wee'' "klein 'di.
6 Ka "ni a dba 'de ‑kle ɛ,
ka "ni a "flua 'de ‑kle ɛ, 'blʋajei nɩ ka "ni a dba
de 'blʋa ‑jɛa 'sʋɛ "kpei ‑wɛe 'blʋa 'a nmɔa.
7 ‑Ta ɔ nɩa 'blʋa "jrukpɔ' ke ɛ,
nyʋ "klein ‑srɛai" a muɛ dɛ 'ʋn 'wlʋa,
‑bo 'cʋ nɩ faan' ke ɛ, ɔɔ' dɛ 'ʋn 'wlʋa a muɛ nya mua'.
8 Ɔɔ' 'beɔdɛ nɩ 'o 'tɔniɛ 'sɔɔn 'nynɩ,
dɛ ‑tba' 'e "ni ‑gbuu ‑nɩa Eflatɩ ‑kwlɩ"
‑ɛ mua mamaʋ ‑ɛ ‑jɛɛa 'blʋa 'a "ti na'.
9 Nyʋ ‑nɩa 'e ‑pɩɔn" blʋa "kpei a muɛ 'kɔi i "siia' 'de ɔ "juɛi,
'de ɔɔ' tʋnyʋ 'a wɔn ɔ muɛ 'blʋ dia'.
10 'Blʋajeʋn ‑wlʋa Taasisɩ ke
nyʋ ‑wlʋa 'e 'tɔniɛ 'ɛ duu' ke
'blʋajeʋn ‑wlʋa Seba' ke Saba ke ‑mʋ ‑wi" a muɔ ‑paan' "jrii nʋa'.
11 'Blʋajeʋn ‑wee'‑ "klein a muɛ 'kɔi i "siia'
'de ɔ "juɛi ‑wɛe ʋʋ ‑wee'‑ "klein 'jeɔ "juɛi nʋʋ‑.
12 Ɔɔ muɛ nɩa" jei ‑ɔɔ poa ‑tooi" ke,
wɛenyɔ ‑ɔ sea kwawɛi ‑te' i 'ble ‑seie 'a.
13 Nyʋ ‑sea' 'kpɩ 'ble ke nɩa" jei ke‑ ɔɔ muɛ ʋʋpʋ‑ 'a wɛe 'jea,
dɛ ‑nʋɛ ɔɔ muɛ nɩa" jei ‑wi" ‑mʋ 'pʋʋa'.
14 Ɔɔ muɛ ʋʋpʋ‑ ‑seie 'a
'de nyʋ ‑gbai" ke 'diwɔniiʋn 'kwa
dɛ ‑nʋɛ ɛmɛ ‑nɩ ʋʋa kɛ' kma 'de ɔ "jri 'de.
15 ‑Aa 'blʋajei nɩ 'kmʋ jeejee,
ɔɔ muɛ 'sani ‑wlʋa 'de Saba 'jea.
Ao bae ɔɔ' Kea, ao 'bo seea,
nyʋ poɔ "diwan‑ 'de 'wɩ 'oo 'wɩ ‑wee'‑ 'di.
16 Kplaa ‑kle a muɛ "i ‑tia', ɩ 'je 'blʋa
‑wee'‑ "klein "i "sii‑ ɩ 'je mu ɩ 'je crʋ "jru nyni,
ɩa' kplɩ a muɛ kwa kua' ɩ 'je "jru ja jaa‑,
kplaa ʋʋa mua cɛan' ɩa muɛ i siia'
ka 'e Diban crʋ "kpei nɩa ‑ke ɛ.
Nyiɔ muɛ i siia 'de "kwi ‑kwlɔ 'dii ka sii" ‑nɩa 'de 'kwla 'di ɛ.
17 Ɔɔ' 'nynɩ nɩ 'kmʋ 'de nɔ" 'oo nɔ" ‑wee'‑ "klein 'di,
ɔɔ' 'nynɩ 'je i jrɛ' ka 'jrʋ nɩa 'de jaʋn 'di ɛ,
‑bo ʋʋa sea ba "diwan‑ po due due' ɛ,
nyʋ a muɛ ɔɔ' 'nynɩ "siia',
‑wɛenyʋ ‑wee'‑ "klein 'je wlu ka: Ɔ nɩɛ 'e 'mʋa‑ 'ʋn.
18 "Diwan kpʋn Tʋ "bo Kea,
Israɛ 'a Kea, ‑mɔ due' ‑ɔɔ nʋa jrii' ɛ,
19 "Diwan kpʋn ɛɛ' Tʋ "bo nynɩ 'de nɔ" 'oo nɔ" ‑wee'‑ "klein 'di
‑wɛe ɛɛ' 'beɔdɛ 'je 'blʋa ‑wee'‑ "klein "kpei ‑gbaa.
Kɩɩn 'kɩ 'je nɩ‑, kɩɩn 'kɩ 'je nɩ‑.
20 Sese 'a "ju Dafi ɔɔ' baea' 'a "tina' ‑nao.